Act 12 | BDD | STEP | Tuta nage 'oina kini Helodi* 'ina loina pa'alina 'ilatuwa, ma 'ina tolo'alehao tupwadi tohekalesiya si'abiyahidiya sabi 'abihegaladi.

Acts 12

Yemesa silohe'amasiya ma Pita deliya silagu luhuweya

1 Tuta nage 'oina kini Helodi* 'ina loina pa'alina 'ilatuwa, ma 'ina tolo'alehao tupwadi tohekalesiya si'abiyahidiya sabi 'abihegaladi. 2 Coinega Yemesa, tauna Yoni tasina, Helodi 'ina loinega sihunuya 'elepega, ma 'i'amasa.

3 Ma meYudiya siyaliyaya Yemesa 'ina 'amasa weyahina. Ta Helodi 'iloina hila ma Pita si'abiyahiya. Ta wiki beno meYudiya 'idi he'asisi 'ana tuta ma beledi daisina, geya 'ana 'ebe gihesesehamo si'aiya.

4 Pitaina si'abiyahiya ma deliya silaguya, ma Helodi 'ina tolo'alehao sikisitini 'iloinaedi silomatayahi bwaibwaini, ma Helodi 'inuwanuwatuhu 'abehega Hataona Guyaina mulina Pitaina 'ida lagulatuhe meYudiya 'oidiya ta 'ina yatala sida paihowa. 5 Coinega deliya si'itayahiya ta tohekalesiyao si'ahwa'ahwanoi waiwai Yehoba 'oina Pita weyahina.

Anelose Pita 'ilemeya

6 Ta Pita tupwana sabwelo 'oina deliya 'imiyamiya, ma hali sabwelo 'oina Helodi Pita 'ida lagulatuhe yatala weyahina, ma hinuwana Pita tolo'alehao 'eluwa gamwagamwanidiya 'i'eno'eno, ma 'ana 'ebepai seni 'eluwa 'oidiyega sipaiya, ma wete deli mata'ahwana tolo'alehao si'ita'itayahi.

7 Ta Yehoba 'ina anelose 'aigeda mwayamwayau 'ilatuma ma deliina 'alona 'i'asilala, ma aneloseina Pita lesulesuna 'isapiya ta 'ilohanohanoya ta 'igwaeya, “Cutoholo mwayamwayau.” Ta 'ana 'ebepai nimanega sibe'uwa. 8 Ma aneloseina 'ihegwaeya, 'igwae, “Ca 'ale'o 'u'ote ma 'a butu 'u'otedi.” Ta gwaeina Pitaina 'ihematamataneya. Ta aneloseina wete 'igwaeya, “Ca hewanuwega 'u'abobo ma 'umuliyegau.” 9 Ta 'ilatuwa ma Pita 'imuliyeya ma 'inuwatuhuya 'abehega 'inihinihi, ta geya 'isanapu 'abehega aneloseina 'ina paihowa moisa.

10 Coinega to'itayahina 'aigeda si'ebesineya, ma heluwena wete si'ebesineya. Cahwa'eda madouna pwawatiyega sipaihoweya 'oina sitauyama, ma 'ahwaina 'iboimo 'i'eso'eya, ma sihapwesa 'asai ma 'eda 'oinega sitauya ta mwayamwayau aneloseina Pita 'i'ebesineya.

11 Ma Pita 'inuwasabwalena ta 'igwae, “Yasanapu pwaiya 'abehega 'ida Bada 'ina anelose 'ihewasaeyama ma 'ilemegauwa Helodi 'ina loina 'oinega, ta gesowana meYudiya 'idi nuwatuhuwao sida paihowadi.” 12 Pitaina nuwana 'isabwalena ma 'itauya Meli 'ina hada, tauna Yoni sinana, ta Yoni sanina heluwena Maki, ma hadaina 'alona tomota baibaiwadi bo'i si'autama ta si'ahwa'ahwanoi Yehoba 'oina.

13 Eeta Pita hada 'ana 'ahwa'eda 'oina 'i'etunatuna'e'eya ma topaihowa mewahinena sanina Loda 'itauyama, 14 ma Pita 'ina gwae 'isanapuya ma 'iyaliyaya madouna, ta geya 'ahwa'eda 'ida so'eya, ma 'ihila mwayamwayau hada 'alona ta 'igwaeya, “Pita 'ahwa'eda 'itotoholo.”

15 Ma sigwae, “Yauyauleiu!”

Ta wahine 'ahwana 'ipa'ala 'abehega tauna Pitaina.

Coinega sigwae, “Nuwana Pita 'alu'aluwana.”

16 Ma Pita 'abwama 'atamana, ma 'i'etunatuna'e'eya. Eeta 'ahwa'eda siso'eya, ma si'iteya tauna, ma nuwadi 'ihenainaida moisa. 17 Ma Pita nimanega 'i'etobodediya ma sihenono, ta 'ihe'ote'otetela 'idi Bada deliyega 'itoeyama. Ta 'igwae, “Wasa bewa wahepwaila Yemesa ma'iyanao wete 'oidiya.” Ma 'i'ebesinediya ta 'itauya hali tupwa.

18 Gona 'i'adaleya ma tolo'alehao nuwadi 'ihenainaida ma si'ateyohowa madouna Pita weyahina, togidega 'ilatu 'esa. 19 Ma Helodi 'iloinaediya ma Pitaina si'ebese. Si'ebe'ebeseya ta geya siloba. Coinega tolomatayahinao 'idi yatala 'ipaihoweya, ma 'adi lohe'amasa 'iloinaediya. Eeta silohe'amasidiya ma Helodiina Yudiya 'oinega 'isuluwa Sisaliya, ma nobwa 'imiyamiya.

Helodi 'ina 'amasa

20 Helodiina meTaiya ma meSaidoni mwalo 'igamwasowalediya, ta sitoho ma Helodi 'ina to'itayahinaina sanina Bilasito si'abihe yaliyaya. Eeta si'abihe yaliyayeya, ma muliyetega mabodaidi sitauyama Helodi 'oina, ta nuwanuwadi ma ba'idanao sida he'iya'iyagu hila, weyahina taudi 'adi 'e'ahai kiniina 'ina tupwega silobaloba.

21 Ta Helodi 'aigeda sabwelo 'iupaeya ma ba'idanao sida gwaegwae. Ma sabweloina 'oina 'ana 'ale'o wasawasa 'i'oteya ta 'ina wagahata* wasawasa 'oina 'imiyatoiya ma bodaedi 'oidiya 'igwaeya.

22 Cigwaegwae 'igumwala, ma bodaedi sibwaubwau, sigwae, “Nage 'aigeda Yehoba 'enana, ma geya tomota 'enana.”

23 Tuta nage 'oina Yehoba 'ina anelose Helodi 'ihunuya, weyahina Yehoba 'ana hepwatu 'ilagu balaheya tauna 'iboi 'oina, ta yapwayapwa 'alona si'aiya, ma 'i'amasa.

24 Ta 'oinega Yehoba 'ina gwae 'ihewaiwai tomota baibaiwadi ma tupwa mabwaiyana 'oidiya. 25 Ta Banaba ma Saulo 'idi paihowa Yelusalema 'oina silohegumwaliya, ma sisulu hilama Anitioki 'oina, ta Yoni sitoeyama ba'idadiu. Yoniina sanina heluwena Maki.